​Rebo, 17 Juni 2026 – Swasana ing KB (Kelompok Bermain) Ananda sing manggon ing Dusun Pojok, Desa Kalirejo, Kecamatan Wirosari esuk iku krasa beda banget. Ora mung kebak guyu ceria lan pethakilane bocah-bocah kaya biasane, nanging ana rasa haru, bangga, lan trenyuh sing nyampur dadi siji. Dina iki pancen dadi dina sing spesial, dina pelepasan utawa wisuda sarjana-sarjana cilik kebanggaane desa!

​Kahanan ing panggung sederhana nanging ditata apik dadi saksi bisu sing nggawe atine para wong tuwa mbrebes mili. Coba bayangke, bocah-bocah cilik sing biasane isih sok nangis golek ibuke pas ditinggal mlebu kelas, sedina iku katon anteng lan nggemesake banget. Kabeh padha dandan rapi, ngagem klambi toga ireng lengkap karo kalung gulu werna ijo lan kuning. Kanthi raut pasuryan sing lugu tur sumringah, tangan cilike nggawa piala kenang-kenangan sing dadi tondho yen dheweke wis lulus saka Kelompok Bermain.

​Ing jejere bocah-bocah sing lagi bungah iki, ngadeg sosok-sosok pahlawan sing tansah sabar nuntun saben dinane. Kepala Sekolah KB Ananda, Ibu Tutik Awaliyah, bareng karo guru kelase, Ibu Suryana, katon mesem bungah ngancani murid-muride. Ing mburine senyum e Bu Guru, mesthi ana rasa sedih amarga kudu pisah karo bocah-bocah sing wis dianggep kaya anake dhewe, nanging luwih gedhe rasa banggane amarga wis kasil ngawal fase pertama pendidikane bocah-bocah iki.

​Ngurus bocah cilik ing jenjang PAUD/KB iku pancen butuh kesabaran sing tikel-tikel. Ibu Tutik lan Ibu Suryana dadi saksi piye perkembangane bocah-bocah iki; saka sing isih isin-isin, nganti saiki wani nyanyi, ngerti werna, lan pinter srawung karo kancane. Momen ngalungake samir lan masrahake piala dadi simbol yen tugas ing KB wis rampung, lan saiki wektune bocah-bocah ngepakke sayap cilik e menyang bangku Taman Kanak-Kanak (TK).

​Pemerintahan Desa Kalirejo mesthi wae ndhukung penuh majune pendidikan ing usia dini iki. Amarga saka panggonan sing manggon ing Dusun Pojok iki, cikal bakal generasi penerus Desa Kalirejo sing pinter lan cerdas wiwit dibentuk.

​Muga-muga, ilmu lan bimbingan saka Bu Tutik lan Bu Suryana ing KB Ananda dadi pondasi sing kuat kanggo masa depane bocah-bocah. Terus semangat sinau, terus pinter, lan dadi kebanggaane wong tuwa ya, le, nduk!

#bj