Setu, 6 Juni 2026 – Swasana ing Dusun Kudon, Desa Kalirejo wengi iku krasa hening nanging kebak rasa paseduluran. Ratusan warga kumpul, lungguh lesehan ngebaki klasa sing digelar ing njero omah nganti tekan emperan. Kanthi raut pasuryan sing khusyuk lan tawadhu, kabeh warga teka nggawa siji tujuan: ngirim donga, maca Yasin, lan Tahlil ing pengetan 7 dina (mitung dina) sedane Bapak Eko Edhi Purwanto, sing nate jabat dadi Kepala Dusun Kudon.

​Kelangan sosok pamong desa sing cedhak karo warga mesthi ninggalake rasa getun lan sedih sing jero. Nanging, rasa sedih kuwi diwujudake kanthi lantunan donga sing ora pedhot saka para jamaah. Swara ayat suci Al-Qur'an lan dzikir tahlil gumema ing njero omah, nggawe ati sing krungu melu ayem lan sumeleh.

​Sing dadi sorotan lan nggawe ati trenyuh wengi iku yaiku tradisi adat Jawa sing isih dijaga kempel banget dening warga Desa Kalirejo. Ing tengah-tengah jamaah sing lungguh melingkar, wis cumepak tatanan bancaan utawa ambengan. Panganan sing diwadahi piring lan diwenehi lemek godhong gedhang iku ditata rapi, dadi ciri khas sing ora bisa dipisahake saka tradisi wong desa. Bancaan iki dudu sekadar urusan logistik utawa mangan-mangan, nanging mujudake simbol rasa syukur, wujud sedekah, lan donga panyuwun marang Gusti Kang Maha Kuwasa amrih roh almarhum padhang dalane, jembar kubure, lan dingapura kabeh dosane.

​Kahanan paseduluran iki sansaya krasa kandel amarga ora mung warga biasa sing sengkuyung teka. Bapak Riali Santoso, SH, minangka PLT Kepala Desa Kalirejo, uga rawuh langsung ing satengahe warga lan melu lungguh lesehan ndedonga bareng. Kehadirane Pak Kades dadi bukti nyata yen paseduluran antarane pamong lan warga ing Kalirejo iku ora ana batese utawa sekat jabatane. Yen ana warga sing lagi nandang susah, kabeh pamong lan tangga teparo melu nyangga bareng-bareng.

​"Kene kabeh kelangan sosok almarhum Bapak Eko Edhi Purwanto. Nanging saka kumpule warga wengi iki, kene iso ndeleng yen amal apike almarhum ninggalake roso tresno sing jero ing atine warga lan kanca-kanca pamong," ngono kurang luwih swasana batin sing krasa ing panggonan kasebut.

​Muga-muga, berkah saka wacan Yasin, Tahlil, lan sedekah bancaan iki bisa dadi sangune almarhum Bapak Eko Edhi Purwanto ing ngarsane Gusti Allah. Lan kanggo kulawarga sing ditinggalake, muga-muga tansah diparingi ketabahan, kesabaran, lan keikhlasan sing jembar. Tradisi gotong royong lan adat Jawa sing kental kaya ngene iki mugo-mugo terus lestari, dadi pengikat tali silaturahmi warga Desa Kalirejo ing wayah bungah utawa susah.(bj)